محرم کے دوران قومی یکجہتی، مذہبی ہم آہنگی کی فضابر قرار رکھنے کیلئے ہر ممکن اقدامات کئے جائیں گے۔ چیف سیکرٹری

غیر ملکیوں بالخصوص چینی با شندوں کی سیکیورٹی مزید سخت کرنے سے متعلق احکامات جاری
پرائس کنٹرول مجسٹریٹس کو فیلڈ میں متحرک کیا جائے، آٹے کی قیمت، طلب اور رسد پر کڑی نظر رکھی جائے، ڈپٹی کمشنرز کو ہدایت

لاہور20جولائی:
سیکیورٹی کے سخت انتظامات یقینی بنانے کی ہدایت کرتے ہوئے چیف سیکرٹری پنجاب زاہد اختر زمان نے کہا ہے کہ محرم الحرام کے دوران قومی یکجہتی، مذہبی ہم آہنگی اور بھائی چارے کی فضا بر قرار رکھنے کیلئے ہر ممکن اقدامات کئے جائیں گے۔
وہ یہاں سول سیکرٹریٹ میں ڈویژنل کمشنرز اور ڈپٹی کمشنرز کے ویڈیو لنک اجلاس کی صدارت کر رہے تھے جس میں محرم الحرام کے دوران سیکیورٹی انتظامات اور پرائس کنٹرول اقدامات کا جائزہ لیا گیا۔ ایڈیشنل چیف سیکرٹری داخلہ، صنعت، خوراک، لائیو سٹاک کے محکموں کے سیکرٹریز اور متعلقہ افسران نے اجلاس میں شرکت کی جبکہ تمام ڈویژنل کمشنرز اور ڈپٹی کمشنرز ویڈیو لنک کے ذریعے شریک ہوئے۔
چیف سیکرٹری نے کہا کہ مجالس اورجلوسوں کیلئے مقررکردہ روٹس اور وقت کی پابندی کو یقینی بنایا جائے اورسیکیورٹی انتظامات کیلئے انتظامیہ پولیس کو مکمل معاونت فراہم کرے۔ انہوں نے کہا کہ کسی بھی ہنگامی صورتحال سے نمٹنے کیلئے پلان تیار ہونا چاہئے۔ چیف سیکرٹری نے غیر ملکیوں بالخصوص چینی با شندوں کی سیکیورٹی مزید سخت کرنے سے متعلق بھی احکامات جاری کئے اور کہا کہ ڈپٹی کمشنرز ڈسٹرکٹ انٹیلی جنس کمیٹیوں کے اجلاس منعقد کر کے رپورٹ بھجوائیں۔
چیف سیکرٹری نے کہا کہ اشیاء خورونوش کی مقررہ نرخوں پر فراہمی انتظامی افسران کی ذمہ داری ہے، گرانفروشی کی روک تھام کیلئے پرائس کنٹرول مجسٹریٹس کو فیلڈ میں متحرک کیا جائے۔چیف سیکرٹری  نے کہا کہ آٹے کی قیمت، طلب اور رسد پر کڑی نظر رکھی جائے، ذخیرہ اندوزی اورناجائز منافع خوری کسی صورت برداشت۔ انہوں نے کہا کہ ذخیرہ شدہ گندم کو ضبط کر کے مارکیٹ میں فروخت کر دیاجائے۔چیف سیکرٹری نے اضلاع میں ہسپتالوں اور میونسپل سروسز بہتر بنانے سے متعلق بھی ہدایات جاری کیں۔