چیف جسٹس پاکستان بندیال نے ارشد شریف کے بہیمانہ قتل کا ازخود نوٹس لے لیا

منگل کو سپریم کورٹ کی جانب سے جاری کردہ ایک بیان میں کہا گیا ہے کہ چیف جسٹس آف پاکستان عمر عطا بندیال نے صحافی ارشد شریف کے بہیمانہ قتل کا ازخود نوٹس لے لیا ہے۔ یہ پیشرفت پی ٹی آئی کے سربراہ عمران خان کے چیف جسٹس بندیال کو ایک خط لکھنے کے تین دن بعد سامنے آئی ہے، جس میں ان سے کہا گیا تھا کہ وہ ارشد شریف کے قتل کی آزادانہ عدالتی تحقیقات کرائیں، جنہیں 24 اکتوبر کو کینیا میں گولی مار کر ہلاک کر دیا گیا تھا۔ وزیر اعظم شہباز شریف نے گزشتہ ماہ اس معاملے کی تحقیقات کے لیے جوڈیشل کمیشن بنانے کا اعلان کیا تھا اور بعد ازاں اس حوالے سے چیف جسٹس کو خط بھی لکھا تھا۔ بیان میں کہا گیا ہے کہ ملک کی صحافی برادری اور بڑے پیمانے پر عوام سینئر صحافی کی موت پر شدید غم وغصے کا شکار ہیں اور وہ عدالت سے معاملے کی جانچ کا مطالبہ کر رہے ہیں۔